Por un feminismu d’ermanas de Tierra

Ermanas de tierra,

un añu más mos alcuentramus enas callis pa revindical-mus juntas, p’alçal las vozis, unil las nuestras manus i defendel los nuestrus derechus i los delos territorius que abitamus.

Á síu un añu de luchi i alevantamientu del puebru gallegu pola defensa del su mou de vida, del agua, dela tierra i del airi. Comu dizi el lema, «dende a Ulloa ata a Ría, terra, auga e aire son vida!». Toa Galicia s’á upau contra una agressión sin comparança, la duna macropranta de celulosa dela multinacional Altri.

Las conseqüencias d’esti proyetu, si s’arremata, sedrían terribris: entri otras custionis, afetaría a toa la cuenca del ríu Ulla — que aboca ena ría de Arousa — , prejudicandu a mariscaoras i al setor dela pesca. El cauzi del ríu á uníu alas mugeris campusinas dela tierra del meyu (A Ulloa, terra do medio) que defiendin el su territoriu, la tierra que trebajan i cudian, frenti al modelu d’acachinal i ucalitizal; i alas mugeris del mar, procupás pola calidá del agua que les da sostribu económicu, i sin la que no s’entiendi el su día a día.

Contra esti proyetu que çalea i eschanga la tierra se hizu un alevantamientu mediáticu que no s’á vistu enantis, que s’agrega a sotrus tantus, quiciás que menus visibris, que tamién luchean contra megaproyetus eólicus o solaris, ampriación de regadíus, estalaciones de ganaería endustrial, proyetus minerus, turísticus i urbanísticus… Entrevencionis que hazin que acontini viva una idea errá de pogressu i crecimientu, ya añeja pa nusotras, porque la ganancia quea nunas pocas manus solu, i agredi alas pressonas i al territoriu.

Ermanas de tierra,

tamién amus golvíu a salil juntas alas callis pol puebru palestinu. Pa muestral la nuestra indinación pola impunidá del Estau genocía d’Israel, una impunidá sostribá polos nuestrus goviernus. Pa muestral que no semus endiferentis a esta injusticia ni a esti sufrimientu. Peru tamién pa muestral la nuestra almiración pola huerça i el teremeñu dela puebración palestina, enrazá, comu los sus olivus i las sus higueras, ena juntura cola su tierra, que mos emociona i espira.

Ermanas de tierra,

vivimus en un territoriu heríu. La dana á dexau dolol i á hechu posá, i mos á dau un golpi de ralidá endispués dela catasfrofi: precisamus de trasformal esti sistema que no dexa de ponel-mus en peligru. La muación climática no es solu una custión astrasta o de graus centígraus, es muerti, despraçamientu forçosu i destruición material tamién entri nusotras.

La imagi dela puenti dela solidaridá, con el su fruíl de genti a pie dendi la ciudá a tous los lugaris afetaus, mos trayía a un alaván que colos sus cuerpus carga escobas i palas, comía i garrafas d’agua, botas i achiperris pa sotras pressonas alas que no conocin. Si mos sustenemus assina es porque avemus concencia de sel vulnerabris i ponemus por delantri la vida al capital: una vida que hazi cambaleal-si las únicas istorias de déssitu que mos aprendierun comu referentis. Una vida ena que la vezindá sali ala calli i aciendi la lumbri i cozina palas demás. Peru ogañu, angunas pressonas án esprimentau la sufrición delos aconteceris climáticus sin que los meyus les aigan hechu assuntu, comu nel casu delas collaças jornaleras que vivin malamenti enos assentamientus chabolistas de Güelva o Almería. La solidaridá dela sociedá i el amparu delas alministracionis no les án llegau.

Por otru lau, mos emociona el lema «El puebru salva al puebru», peru no poemus olvial que toas essas pressonas alas que votamus horman parti dél, i que lo púbricu tamién salva al puebru. Ain enfiniá de simientis asperandu para renacel en estas tierras. I essi renacel mos hazi maginal otrus mous possibris de vivil: enos que la güena vida, la alimentación sana, las condicionis de trebaju dinas i mesmamenti la salú no tengan relación denguna con el códigu postal del lugal andi vivimus. Hormas de vivil enas que no olviemus a naidi.

Por essu, queremus oi dizil bien de reciu una espressión dela güerta valenciana que mos emociona:

A tornallom.

Se mienta assina a una delas hormas de trebaju comunalis ena que se hazi el entrecambiu de lavoris sin dineru. Una manera d’abital una tierra en vezindá, que cudia los lazus con toas essas pressonas conas que vivimus en juntança i que, enque otrus s’empeñin en inoral i descruíl, es unu d’essus muchus actus que dan horma al relatu que oi mos premiti seguil aquí. Oxalá sea tamién la manera que mos dexi invental mous de vivil que no solu silvan p’avadal los golpis dela muación climática, sinu que puean ayual a fresná-la.

Porque,

Ermanas de tierra

sonin ellas, las mugeris que cudian, las que sustienin el tecíu delas sus familias i comuniais, las que afrontan los desafíus climáticus con una carga emocional i sicológica que, a menúu, quea açonchá.

Las mugeris del campu s’alcuentran ena primel línea del luchi por un huturu abitabri. Mos enfrentamus a una crecienti ecoansiedá, a una precupación persistenti i legítima polos efetus dela muación climática. Esti mieu, agrandau por estal en verita la tierra i los recussus naturalis, mos golpea con más huerça alas cudiaoras de puebru. Guardianas dela contorná, sufrimus primeru i más hondamenti las muacionis enos cicrus naturalis, las sequías, las barcunás i la destruición del suelu.

Vivimus con aginus, azoguis, tristezas, enestabliais, priesas, culpas i sobrecargas, obrigás a menúu a acetal trebajos enestablis i mal pagaus que desgalazan el terrenu alreol de nusotras. El sistema mos empuxa ala busca individualizá de sobrevivencia, mos tupi de boticas i medicaliza las nuestras vidas. Sobremedicinal, utomedicinal, medicinal sin seguimientu ni acabaeru, no bastan pa paral el grandi desafíu dela defensa del nuestru territoriu, la salú delos nuestrus cuerpus i la delas nuestras comuniais amenazás.

Ermanas de tierra,

que la nuestra tierra afloreça a pesal delas compricacionis.

Acontinamus firmis ena esperança i la movición, porque sabemus que enas nuestras manus está la possibiliá dun huturu abitabri i sostenibri. Peru mos alcuentramus en un momentu terminanti, en el que el esplotiju desmedíu delos recussus naturalis, la privatización de bienis coletivus i l’avanci de modelus económicus de sacaeru amenazan la vida nel praneta i el tecíu social delas nuestras comuniais. Frenti a esta crisis, alçamus la nuestra vos pa revindical i afial los bienis comunalis, sencialis pala vida enos nuestrus puebrus, pa cudial los montis, los praus, los manantíus, los ríus, las hesas, pa protegel toa horma de vida i mesmu la nuestra. I hazé-lu dendi tierras comunalis, que sonin de toas i de naidi; tierras abiertas, sin fechi, orizontalis, tierras que acogin i alimentan. Tierras pa sel abitás.

En un mundu apergollau pola idea del crecimientu económicu desacotau, mos alcuentramus frenti a una crisis ecosocial sin comparança. Frenti al modelu dominanti centrau nun capitalismu de sacaeru, precisamus duna trasformación prohunda delos prencipius delos paísis del norti global. El decrecimientu no senifica atrasu ni emprobecemientu, sinu una muança enos assuntus consideraus emportantis: produzil menus i mejol; consumil menus, peru con mayol sentíu; vivil dun mou más comunitariu i en equilibru con el cuerpu, los otrus cuerpus, el engranagi natural, el territoriu.

Mos cumpri recuperal el tiempu comu tiempu de vida, comu manera d’abital. No mos cumpri vivil siempri nun tiempu produtivu, burocratizau, un tiempu pal esplotiju i el consumu. Mos cumpri ahinchonal el deseu i la alegría, tamién comu política rebulliora i crítica, dendi lo común vivu, en contatu conas realiais que avemus. Revendicamus el convivialismu, la alegría, lo festil, partiendu de lugaris i tiempus pa celebral la vida, pa alcuentral-mus, pa disfrutal.

I no estamus solas, porque llevamus con nusotras la huerça de toas essas que vinun enantis de nusotras, de toas essas que vendrán endispués.

Por un feminismu de toas,

por un feminismu d’ermanas de tierra.

El letreru es obra de Vanesa Freixa. Poís descargallu velaquí.

Esti manifiestu hue canteau al estremeñu por Aníbal Martín, i leyíu tamién por Aníbal Martín.

* Esti manifiestu á síu possibli pol trebaju coletivu de Blanca Casares, Lareira Social, Leire Milikua, Lucía López Marco, María Montesino, María Sánchez, Patricia Dopazo, Ada i Irea de REAMA Friol, Ana Pinto Lepe de Jornaleras de Huelva en Lucha i Elisa Oteros. Ermanas de Tierra es un manifiestu pal 8M que hue apuchau dendi 2018 por María Sánchez i Lucía López Marco.

hermanasdetierra@gmail.com