Por un feminismu d’hermanes de tierra
Por un feminismu d’hermanes de tierra
Declaremos costume qu’amaneza y miremos al cielu en cata de señales d’agua, nuna tierra afarao pola seca. En dellos puntos empieza a dilise la xelada, crecen los regueros; el mofu envolubra corteces, piedres, árboles, recordándonos que la vida sigue, que nós tamién tamos equí, que tamién somos parte del territoriu.
L’informe caberu del IPCC vuelve recordanos que somos vulnerables al cambiu climáticu, y que yá nun valen les medies tintes. Nun podemos allargar más la inacción: si non, vamos perder esa pequeña y fugaz ventana d’oportunidá que pue asegurar, pa toles persones, un futuru habitable y caltenible.
Esti iviernu primaveral nun pue distrayenos de la emerxencia climática, de la falta d’agua que seda los nuesos suelos, de los macroproyectos qu’acosen el nuesu territoriu y qu’amenacien les múltiples formes de vida de los nuesos medios rurales. Por eso tamos equí, alzamos la voz, caltenemos el territoriu, nun dexamos de texer redes ente nós, sofitando y visibilizando too aquello que nos amenacia y quier faenos cayer. Xuntes vamos poder enfrentar les torgues y superar tolos zarapicos, porque ensin l’allegría y la empatía nun somos nin vamos ser nada.
Hermana de tierra,
otru marzu más
volvemos enllenar les nueses places y cais, reivindicando qu’otru mañana ye posible; un futuru d’igualdá, diversidá y sostenibilidá. Güei queremos, toes xuntes, empezar a habitalu: nun perder nunca la esperanza.
L’andanciu sigue solmenándonos, pero nós supimos avanzar siendo rebañu. Como toes eses oveyes que s’arrexunten y protexen les sos cabeces debaxo del cuerpu de les sos compañeres. Nun pensamos un mediu rural ensin el colectivu: ensin l’ayuda y el sofitu mutuu nun vamos poder siguir alantre.
Nun queremos formar parte d’esa ruralidá solitaria y zarrada que quier imponese, que s’aprovecha, qu’engaña y que s’enferrona a una señardá peligrosa que romantiza la desigualdá y el machismu que — por desgracia — vivieron les nueses madres y güeles. Que nos reprime y nos amenorga namás a tradición y maternidá, que nun quier — y al que nun-y interesa — abrir una ventana a la diversidá y a la realidá de los nuesos medios rurales.
Porque precisamos nueves ruralidaes enllenes de feminismos, agroecoloxía, diversidá, pero tamién d’alcordanza. Nestos tiempos nos que nos traviesa la incertidume, ye importante saber d’ónde venimos pa pensar ya imaxinar siendes que nos lleven a un futuru meyor; caminos que puedan enseñanos, dende otros deprendizaxes, escontra ónde podemos y queremos dir.
Por eso aguardamos otru añu más cola mesma paciencia a que florie’l sabugu, a que les malves anubran los campos, a que’l golor de la menta y l’albahaca torne al aire qu’alendamos. Tamién a recoyer xuntes los frutos de los árboles, les hortolices de la tierra. Vamso tornar a compartir les nueses recetes, a visibilizar toa esa conocencia que tantes vegaes despreciar por nun venir de l’academia. Tal como nos enseñaron tantes muyeres que nos precedieron, como les nueses güeles, vamos desenduvellar los saberes y vamos xunir los filos, vamos refaer les madexes; vamos poder formar parte d’un telar qu’acueya pero que tamién s’entrugue, qu’actúe como ponte ente aquelles de les que venimos y aquelles que van venir.
Les amenaces de güei nun dexen de ser, en parte, les mesmes de siempres, amarutaes embaxo les pallabres «progresu» y «prosperidá». Pero nós somos como eses cases de les nueses aldees, fuertes, llevantaes coles piedres del propiu paisaxe, feches d’árboles y diálogos cola tierra. A pesar de los banzaos, del abandonu y del esiliu forzáu, munches d’elles caltiénense de pies, testigos de la enganía d’un sistema hiper estractivista que piensa namás en dineru y en producción, n’usar les pallabres verde y anovable pa llavar les manos; pa dexar, con tola impunidá del mundu, qu’abonden per tol territoriu macroproyectos que ponen en riesgu espacios naturales protexíos y d’altu valir ambiental. Monocultivos de plaques solares y parques eólicos, ermos verdes, naves intensives onde ruempe’l venceyu ente’l territoriu, la persona y l’animal. Esplotaciones industriales que contaminen los nuesos suelos y l’agua que bebemos. Nun queremos esta fiebre d’industralización que contamina, precariza y matu. Qu’escaez a toes aquelles persones qu’habiten y faen posibles los nuesos pueblos, invisibilizando y vulnerabilizando a colectivos como’l de les muyeres migrantes, entá ensin condiciones dignes de trabayu y de vida. Equí tamos p’alzar la voz, pa dicivos que nun vamos dexar de lluchar por garantizar una tierra digna.
Hermana de tierra, nun dexamos de ser árboles. Guañaes ente nós, coles nueses acciones y pallabres tamién podemos ser simbiosis, rizomes, montes. Enxareyaes güei manifestámonos, cantamos, damos la mano, echamos a andar ensin mieu, siempres p’alantre. Ver nel resurdimientu del pinu canariu dempués del volcán, tamién nes tendalaes marines que ven crecer les primeres algues. A pesar de la llava y la ceniza, siempres vuelven los biltos.
Güei más que nunca pensamos en toles hermanes ucranianes, pero tamién en toes aquelles que sufren en tantos conflictos armaos invisibilizados. Güei elles lluchen, fuxen escontra les fronteres buscando otru mañana coles sos fíes, dexando detrás a la so xente, a los sos raigaños. Mientres vemos nes pantalles cómo n’Ucraína munches recueyen nieve pa poder beber, pa dalgunos paez que la única esmolición ye l’aumentu del preciu na cebera pa les sos producciones intensives. Tamién elles enllenen de granes los bolsos de dellos soldaos rusos pa que la tierra nunca dexe de floriar, magar la guerra, la violencia, la muerte.
Hermanes, nun tais soles.
Otru añu más, siguimos equí, tamos equí. Magar l’andaciu, la seca, el volcán, les guerres… Equí nomamos, equí sentímonos más xuníes que nunca. Equí faemos frente, compartimos les nueses medranes, dexamos a un llau el silenciu. Reivindicamos qu’esisten munches maneres d’habitar el territoriu, munches ruralidaes que dialoguen, que constrúin, que curien y acueyen. Una d’hermanes de tierra: enllena de feminismu y diversidá, d’agroecoloxía, de memoria, d’interdependencia, esperanza y allegría.
Por un feminismu de toes, por un feminismu d’hermanes de tierra.
La ilustración ye de Mayte Alvarado. Podéis descargala equí.
(Esti Manifiestu escribiéronlu Lucía López Marco y María Sánchez. Gracies a los conseyos y aportaciones de Celsa Peitado, Blanca Casares, Patricia Dopazo, Julia Alvarez, Karina Rocha, y Elena Medel. Y a tantes que fixistis llegar les vueses aportaciones.)
Esti manifiestu foi traducíu al asturianu por Inaciu Galán.
