Por un feminismu d’Hermanes de Tierra 2025
Hermanes de tierra,
Un añu más atopámonos nes cais pa reivindicanos xuntes, p’alzar les voces,
xunir les nueses manes y defender los nuesos drechos y los de los
territorios qu’habitamos.
Foi un añu de llucha y movilización del pueblu gallegu pola defensa de la
so manera de vida, de l’agua, de la tierra y del aire. Como diz la conseña,
«dende a Ulloa ata a Ría, terra, auga e aire son vida!». Toa Galicia ta de
pies contra una agresión ensin precedentes, la d’una macroplanta de
celulosa de la multinacional Altri.
Les consecuencies d’esti proyectu, si llega a fin, sedríen devastadores: ente
otres cuestiones, tola cuenca del ríu Ulla — que desagua na ría de Arousa —
veríase afectada, perxudicando a mariscadores y al sector pesqueru. El
calce del ríu xunió a les muyeres llabradores de la tierra del mediu (A
Ulloa, terra do medio) que defenden el so territoriu, la tierra que trabayen y
curien, frente a un modelu d’espoliu y ocaliptización; y a les muyeres del
mar, esmolecíes pola calidá de l’agua que-yos da sustentu económicu, y
ensin la que nun s’entiende’l so día a día.
Contra esti proyectu que ruempe y estroza la tierra llevantóse una
movilización mediática ensin precedentes, que se suma a tantes otres,
quiciabes menos visibles, que tamién lluchen contra megaproyectos eólicos
o solares, ampliación de regadíos, instalaciones de ganadería industrial,
proyectos mineros, turísticos y urbanísticos… Intervenciones que perpetúen
una idega equivocada de progresu y medra, que yá ta caduca pa nós, porque
solo atropa beneficiu nunes poques manes y afrella a les persones y al
territoriu.
Hermanes de tierra,
tamién volvimos salir xuntes a les cais pol pueblu palestín. P’amosar la
nuesa indignación pola impunidá del estáu xenocida d’Israel, una impunidá
sostenida polos nuesos gobiernos. P’amosar que nun somos indiferentes a
esta inxusticia nin a esti sufrimientu. Pero tamién p’amosar la nuesa
almiración pola fuercia y la resistencia de la población palestina,
enraigonada, como los sos olivos y les sos figales, nel venceyu cola so
tierra, que nos emociona ya inspira.
Hermanes de tierra,
vivimos nun territoriu feríu. La dana dexó dolor y remortines, y un güelpe
de realidá dempués de la catástrofe: precisamos tresformar esti sistema que
nun dexa de ponenos en peligru. El cambéu climáticu nun ye namás un
fenómenu astractu o graos centígrados, ye muerte, desplazamientu forzáu y
destrucción material tamién ente nós.
La imaxe de la ponte de la solidaridá, col so fluyir de xente a pie dende la
ciudá a toles llocalidaes afectaes, traíanos a un ensame que colos sos
cuerpos carga escobes y pales, comida y garrafes d’agua, botes y enseres pa
otres persones a les que nun conocen. Si sostenemos asina ye porque
reconocémonos vulnerables y anteponemos la vida al capital: una vida que
fai cimblar les úniques hestories d’ésitu que nos enseñaron como
referentes. Una vida na que la vecindá échase a la cai y prende la lleña y
cocina pa les demás. Pero anguaño, delles persones viéronse afectaes por
fenómenos climáticos ensin recibir l’atención de los medios, como ye’l
casu de les compañeres xornaleres que malviven nos asentamientos
chabolistas d’Huelva o Almería. La solidaridá de la sociedá y l’amparu de
les alministraciones nun-yos llegaron.
Per otru llau, conmuévenos la conseña «El pueblu salva al pueblu», pero
nun podemos escaecer que toes aquelles persones a les que votamos formen
parte d’él, y que lo público tamién salva al pueblu. Hai infinidá de
semientes esperando pa renacer nestes tierres. Y esi renacer déxanos
imaxinar otres maneres posibles de vivir: nes que la bona vida,
l’alimentación sano, les condiciones llaborales dignes y la mesma salú nun
tengan nada que ver col códigu postal del nuesu llugar de residencia.
Maneres de vivir nes que nun escaezamos a naide.
Poro, queremos güei dicir bien alto una espresión de la güerta valenciana
que nos emociona:
A tornallom.
Llámase asina a una de les formes de trabayu comunales na que se realiza
l’intercambiu de xeres ensin dineru. Una manera d’habitar una tierra en
vecindá, que curia los llazos con toes aquelles persones coles que
convivimos y que, por muncho qu’otros s’empeñen en resalvar y escluyir,
ye unu de tantos xestos que conformen la narrativa que güei fai que
sigamos equí. Axallá que seya tamién la manera que nos dexe inventar
maneres de vivir que non solo suavicen los impactos del cambéu climáticu,
sinón que puedan contribuyir a frenalu.
Porque,
Hermanes de tierra,
son elles, les muyeres que curien, les que sostienen el texíu de les sos
families y comunidaes, les qu’encaren los desafíos climáticos con una
carga emocional y sicolóxico que con frecuencia permanez invisible.
Les muyeres rurales atópense na primer llinia de la llucha por un futuru
habitable. Enfrentámonos a una creciente ecoansiedá, a una esmolición
persistente y llexítimo polos efectos del cambéu climáticu. Esta medrana,
intensificada pola nuesa cercanía directa cola tierra y los recursos naturales,
cútenos con más fuercia a les cuidadores rurales. Guardianes del entornu,
carecemos primero y más fondamente los cambeos nos ciclos naturales, les
seques, les llenes y la degradación del suelu.
Convivimos con ansiedaes, esmoliciones, murnies, inseguridaes, prieses,
culpes y sobrecargues, obligaes de cutiu a aceptar trabayos precarios
qu’estrocen el nuesu entornu. El sistema embúrrianos a una busca
individualizada de supervivencia, enllénanos de pastilles y medicaliza les
nueses vides. Sobremedicación, automedicación, medicaciones ensin
siguimientu nin finalización, nun basten pa parar l’enorme desafíu que
supón la defensa del nuesu territoriu, la salú de los nuesos cuerpos y la de
les nueses comunidaes amenazaes.
Hermanes de tierra,
que la nuesa tierra florie magar les adversidaes.
Caltenémonos firmes na esperanza y l’acción, porque sabemos que nes
nueses manes ta la posibilidá d’un futuru habitable y sostenible. Pero
atopámonos nun momentu críticu, nel que la esplotación desmidía de los
recursos naturales, la privatización de bienes colectivos y l’avance de
modelos económicos estractivistas amenacen la vida nel planeta y el texíu
social de les nueses comunidaes. Énte esta crisis, alzamos la nuesa voz pa
reivindicar y protexer los bienes comunales, esenciales pa la vida nos
nuesos pueblos, pa curiar los montes, los pacionales, los acuíferos, los ríos,
les deveses, pa protexer toa forma de vida y la nuesa propia. Y faelo dende
tierres comunales, que son de toes y de naide; tierres abiertes, ensin zarros,
horizontales, tierres qu’acueyen y nutren. Tierres pa ser habitaes.
Nun mundu apoderáu pola llóxica de la medra económica illimitada,
atopámonos énte una crisis ecosocial ensin precedentes. Frente al modelu
dominante basáu nun capitalismu estractivista, precisamos un
tresformamientu radical de les llóxiques de los países del norte global. El
decrecimientu nun significa retrocesu nin emprobecimientiu, sinón un
cambéu nes prioridaes: producir menos y meyor; consumir menos, pero con
mayor xacíu; vivir de manera más comuñal y n’equilibriu col cuerpu, los
otros cuerpos, l’ecosistema, el territoriu.
Queremos recuperar el tiempu como tiempu de vida, como manera
d’habitar. Nun queremos vivir siempres nun tiempu productivu,
burocratizáu, un tiempu pa la esplotación y el consumu. Queremos
potenciar el deséu y l’allegría tamién como política efervescente y crítica,
dende lo común vivo, en contactu coles distintes realidaes. Reivindicamos
el convivialismu, l’allegría, lo festivo, a partir d’espacios y tiempos pa
celebrar la vida, p’atopanos, pa esfrutar.
Y nun tamos soles, porque llevamos con nós la fuercia de toes aquelles que
nos precedieron, de toes aquelles que nos siguirán.
Por un feminismu de toes,
por un feminismu d’hermanes de tierra.
El cartelu ye obra de Vanesa Freixa. Puede descargase equí.
(*) Siguimos utilizando les categoríes de muyer (y hermana) por
considerales inda útiles pa incidir políticamente na nuesa realidá actual,
pero somos conscientes de que somos diverses tocantes a vivencies,
trayectories, capacidaes, cuerpos ya identidaes. L’asteriscu pretende xunir
toa esa diversidá.
Esti manifiestu foi traducíu a l’asturianu por Jennifer Berrocal, y foi
llocutáu por Jennifer Berrocal. Puedes escuchalu equí.
Esti manifiestu foi posible gracies al trabayu colectivu de Blanca Casares,
Lareira Social, Leire Milikua, Lucía López Marco, María Montesín, María
Sánchez, Patricia Dopazo, Ada y Irea de REAMA Friol, Ana Pinto Lepe de
Xornaleres d’Jornaleras de Huelva en Lucha y Elisa Oteros. Hermanes de
Tierra ye un manifiestu pal 8M que foi impulsáu dende 2018, por María
Sánchez y Lucía López Marco.
Puedes sofitar el manifiestu y el trabayu d’Hermanes de tierra, equí.
