Por un feminismu d’hermanes de tierra

Un marzu más, tres un iviernu cuasi ausente por cuenta de les altes temperatures que provoca la emerxencia climática, nós volvemos alzar la voz pa cuntar lo que nos traviesa.

Anguaño tenemos qu’entamar falando de Palestina, una tierra que lleva décades siendo espoliada y qu’agora carez un xenocidiu per parte del Estáu d’Israel. La población civil de Gaza ta siendo víctima de bombardeos, fames y enfermedá. Asina tamién se destrúi un pueblu, negando l’accesu a la tierra y a la so soberanía alimentaria. Duelnos Palestina: ye insoportable ver acaldía imáxenes del xenocidiu nes pantalles y siguir coles nueses vides como si nada. Dende los nuesos pueblos esiximos un altu al fueu y una Palestina llibre pa los sos habitantes.

Por elles, poles muyeres de Palestina, qu’aguanten y lluchen contra la ocupación y que, como pueden, curien de les sos families y les sos comunidaes intentando que llegue daqué d’alimentu y agua, protexendo, sobreviviendo, amparando, nuna guerra declarada contra la tierra y la vida.

Hermanes de tierra, vivimos díes convulsos, con tractoraes nes cais; parte del campu movilízase. L’ecu de les protestes da de llenu nuna mirada paternalista, condescendiente y bien venceyada a la ciudá. Una mirada y una manera de cuntanos, amenorgándonos a un solu tipu de campu y de rellatu. De xacíu, somos conscientes de los intereses que respuenden a esi apueste comunicativu, y esmoleznos el tracamundiu qu’ello xenera. ¿Qué se reivindica? ¿Quién lo faen? ¿Quién pueden facer? ¿Dende qué llugares se fai?

Nel manifiestu de los Llevantamientos de la Tierra’, de los movimientos franceses pola defensa del territoriu, lleíamos que la ecoloxía va ser llabradora y popular o nun va ser. Añadimos que’l nuesu campu, el campu que tamos construyendo, va ser agroecolóxicu y popular o nun va ser. Queremos que lo componga’l campesináu y non l’agroindustria.

Apura un cambéu de modelu, unu que ponga nel centru la vida, el caltenimientu del territoriu y la biodiversidá, que nos alimente con comida sano y que nun nos faiga carecer, y nel que toles persones que trabayen nél tengan condiciones de vida dignes.

Creyemos dafechu que ye na propuesta agroecolóxica onde cabemos toes. La totalidá del territoriu funciona de manera acompasada, respetando les llendes de los nuesos bienes naturales, texendo una rede afectiva, sociocultural y económica al traviés de los alimentos que xeneramos y consumimos; al traviés de la reconocencia de la valoración y el cuidu mutuu ente les persones qu’alimenten y les que son alimentaes.

Tamos fartes de discursos d’odiu que señalen como enemigu al igual, y que nos dexen ensin enerxía pa denunciar el sistema que nos quier engarraes. Toes somos hermanes, y pensamos que, dende’l respetu, la honestidá y el sofitu mutuu vamos poder facer un mediu rural vivu, diversu, nel que podamos tar toes. Sedría importante facer l’exerciciu d’entrugar cómo nos gustaría alimentanos y saber qué nomes, hestories y vides trai consigo’l nuesu platu comida.

Creyemos que ye urxente la redignificación de les persones que trabayen faciendo posible la nuesa alimentación. Vivimos nun sistema onde la comida tírase como si nada, nel que nun se valora l’actu de comer y onde munches vegaes enllenamos el carru la compra de manera mecánica, ensin pensar en qué hai detrás de cada alimentu que coyemos. De xacíu, nun queremos cayer nel discursu que culpabiliza. Somos conscientes de la comida que llega a los supermercaos, del tiempu que fai falta pa mercar de forma consciente y pa cocinar, y del sistema nel que tamos que nos precariza y escosa.

Reivindicamos el derechu a la imaxinación. Queremos nun dexar d’imaxinar, formar parte de discursos nos que seyan deseables otros mundos. Una política del deséu que vaiga muncho más allá del enfotu de consumir (seya como quier, siempres más, siempres darréu). Queremos discursos que xeneren esperances, que ruempan cola superioridá moral amestada a les academies y los centros.

Hermanes de tierra, siguimos equí les que, n’ocasiones, nun podemos dexanos nin salir a la cai nin protestar. Siguimos les amarraes a una cama o a un sillón, ensin opción al más mínimu movimientu. Les escluyíes, les etiquetaes por vivir otres maneres de sentir, de facer o dicir. Siguimos les refugaes por tener un diagnósticu psiquiátricu, les que cobramos menos nun mesmu trabayu por dalguna discapacidá. Siguimos les maltrataes, dientro de rellaciones perverses y crueles. Siguimos les invisibilizadas a pesar d’años de saberes. Siguimos TOES ales que nos faen de menos por nun cumplir colos mandatos de sociedaes machistes, capacitistes, cuerdistes o edadistes.

Y con esta diversidá, siguimos arriqueciendo territorios enllenos de vulnerabilidaes y fortaleces, construyendo otres formes d’habitar, de compartir y de vivir.

Hermanes de tierra, nun escaecemos a toles muyeres migrantes que trabayen, munches vegaes estacionalmente, en fábriques, campos ya invernaderos. Con remuneración distinta en función del so orixe, ensin llibertá de falar mientres trabayen, ensin garantía de facer les hores contrataes y cobrales si nun hai producción.

Amás de tolo mentao, nel casu de les muyeres que trabayen nes fábriques de selección, destrío, almacenamientu de fruta pel branu, faciendo’l so llabor a pocos graos pa garantizar l’estáu de la fruta que va ser darréu distribuyío y con horarios variables, tamién de nueche, que ponen bien difícil una conciliación familiar, más siendo en tiempu branizu ensin aules.

Hermanes de tierra, queremos trayer l’allegría a esti manifiestu. Y reivindicamos con arguyu a les nueses vecines, eses muyeres que siempres paren nes cais de los nuesos pueblos a charrar, que saquen les sos sielles al frescu, que comparten braseru y comíes, que siempres tán ende formando comunidá. Queremos una vida digna pa toes, que sintamos allegría y suerte de vivir onde vivimos. Por toes eses muyeres que s’esmolecen de quien vive nel so pueblu y respeten que cada quien seya como quiera ser. Nun hai tiempu de xulgar, sinón de tar pa quien lo precise. Ensin escaecenos de que, dacuando, podemos ser nós les que precisemos sofitu, porque la fortaleza y la vulnerabilidá son atributos que nos pertenecen.

Queremos mirar al futuru y venos nél, asina. Pero pa ello, precisamos l’accesu a servicios básicos, y precisamos que la cultura nun seya esclusiva de les ciudaes y que nun asoceda namás en díes de fiesta. Los nuesos pueblos tamién son cultura. ¡Atopemos la forma y la fórmula!

Ye esencial caltener espacios p’articular una biblioteca, una ludoteca, un teatru, una sala pa proyectar películes… Espacios que se tresformen y faen posible la vida de mancomún. Espacios pal diálogu y la comunidá.

Equí nomamos, equí sentímonos más xuníes que nunca. Equí facemos frente, compartimos les nueses medranes, dexamos a un llau’l silenciu. Reivindicamos qu’esisten munches maneres d’habitar el territoriu, munches ruralidaes que dialoguen, qu’aprienden, que constrúin, que curien y acueyen. Una d’hermanes de tierra: enllena de feminismos y diversidá, d’agroecoloxía, de solidaridá colos pueblos primíos, de memoria, d’interdependencia, de sofitu mutuu, esperanza y allegría.

Por un feminismu de toes, por un feminismu d’hermanes de tierra.

*El cartelu ye obra d’Iraia Okina. Podéis descagalu equí.

**Esti manifiestu foi traducíu al asturianu por Inaciu Galán y llocutáu nesti idoma por Jennifer Berrocal.

***(Esti manifiestu foi posible gracies al trabayu colectivu de Leire Milikua, Blanca Casares, Patricia Dopazo, Lareira Social, María Sánchez, María Montesino, Jornaleras de Huelva en Lucha, Lucía López Marco y Colectivo Arterra. Hermanes de tierra ye un manifiestu pal 8M que foi impulsáu dende 2018, por María Sánchez y Lucía López Marco.)